Gjatë fjalës së tij në mbledhjen e përbashkët mes qeverive të Shqipërisë e Kosovës, kryeministri Rama nuk është kursyer aspak ndaj Bashkimit Evropian.
Ai tha se është i zhgënjyer ndaj BE-së për mos-heqjen e vizave, teksa tha se Shqipëria dhe Kosova e meritojnë liberalizimin e vizave.
“Për Shqipërinë, Kosova është një shtet sovran, i pavarur dhe i barabartë me të ngjashmin e tij. E drejta ndërkombëtare nuk njeh gjysmë shtete. Ne i kemi mirëpritur dhe i mirëpresim në çdo çast të gjitha dinamikat dypalëshe apo shumëpalëshe që çojnë drejt plotësimit kuadrin të gjymtuar të Kosovës dhe dinjitetit të popullit të lëvizjes së tij të lirë.
Mbetemi të zhgënjyer nga qasja e BE-së dhe atyre shteteve që janë në themel të pavarësisë së Kosovës, në raport me të drejtën për lëvizjen e lirë. Ja pse themelimi i Forcave të Armatosura të Kosovës ishte hapi i duhur në drejtim të plotësimit të kuadrit të një shteti që nuk mund të jetë një gjysmë-shtet. Por vonesat në procese si Interpoli më së fundmi janë shfaqje dekurajuese.
Kosova ka shfaqur që në krye të herës dëshirën për të kapërcyer të shkuarën përmes një dialogu të sinqertë. Kosova ka treguar se është në gjendje të luajë rolin e saj ndërkombëtar”, tha Rama, duke folur me nota kritike ndaj Serbisë dhe Bashkimit Europian.
Edhe kryeministri Ramush Haradinaj tha se Kosova i ka përmbushur të drejtat e saj dhe pret që këto të drejta të respektohen edhe nga misionet vendimmarrëse të Bashkimit Europian.
