Gjatë fjalës në Kuvend, kryeministri Rama nuk e ka kursyer aspak ironinë për kreun e PD-së, Lulzim Basha, dhe videot live që poston së fundi nga makina, gjatë udhëtimeve në turin që ka nisur në vend. Më tej ai u shpreh se kanë për detyrë të fitojnë zgjedhjet e të vijojnë betejën. Kryeministri nuk anashkaloi edhe mundësitë për dialog, teksa foli për një fitore në bazë të rregullave.
“Ata kanë ikur, ata janë në të drejtën e tyre të ikin, të mos marrin pjesë në zgjedhje. Detyra jonë është të mos pengojmë askënd, por jo të bindim të gjithë të marrin pjesë në zgjedhje. Detyra që nuk i kemi, nuk kemi pse ti marrim përsipër, futen ato, apo jo nuk është detyra jonë, detyra jonë është të fitojmë zgjedhjet dhe të vazhdojmë një beteje të madhe aspak të lehtë. E të përballem me të metat dhe gabimet tona e të përmirësohemi çdo ditë për të qenë çdo ditë e më të vlefshëm për njerëzit.
Mundësitë për dialog i kemi diskutuar këtu. Ata kanë një karrige vëzhguesi në Komisionin për Reformën Zgjedhore, dhe kanë status të veçantë se mund të vendosin edhe veto për gjëra që nuk janë dakord, se ne nuk duam që ata të asgjësohen. Duam ti mundim në 2021 me rregulla të përcaktuara e dakordësuara bashkërisht.
Deri në 2021 kanë kohë të përgatiten të përmirësojnë edhe selfiet nga vetura, dhe në momentin e përballjes elektorale të shikojnë se çfarë mendon populli shqiptar”.
