Grida Duma e ka quajtur “skandal” largimin e Ministrit për Evropën dhe Punët e Jashtme Ditmir Bushati nga kjo detyrë. E ftuar në “News 24”, Duma tha se largimi i Bushatit tregon se PS dhe shteti udhëhiqen vetëm nga një njeri, ndërsa tha se Rama ka de facto një qeveri teknike.
“PS sot është më shumë e përçarë sa mund të duket në publik, për arsye se PS sot nuk përfaqësohet nga qeveria e vet, në kuptimin qoftë edhe të kontributeve që kanë ministrat aktualë, sepse Rama sot po qeveris me ministra teknikë. Në shumicën e rasteve janë njerëz të panjohur që nuk kanë asgjë për të thënë në kuptimin individual. Arriti dhe kulmimin që zhduku edhe ministrat politike. Për mua është skandal i madh ajo që ka ndodhur me Bushatin, është skandal i madh me ministrin e jashtëm. Ai zhduk komponent të rëndësishëm, që kanë kontributin e vet në PS, kjo tregon qartazi që ky individi është individualisht në pushtet”, tha ish-deputetja demokrate Grida Duma.
Grida Duma komentoi strategjinë e opozitës lidhur me situatën politike në vend, për të cilën tha se nuk është një situatë e zakontë, por një situatë krize. Duma tha se opozita po rrezikon shumë, po rrezikon të dalë jashtë sistemit, me qëllim për të ndërtuar sistemin.
“Padyshim nuk mund të shpikim rrotën në këto kushte. Unë mendoj që dukeqenëse opozita i dogji mandatet, sa i përket ekstremitetit të aksionit të vet e ka kryer, që në momentin që ka djegur mandatet, ka bërë një sakrificë të jashtëzakonshme duke marrë përsipër të krijojë një situatë të jashtëzakonshme, sa i përket llojit të aksionit politik. Djegia e mandateve surprizoi dhe shokoi situatën politike. Nuk ka shumë risi në javët që do të vijojnë, sepse nuk ka edhe shumë mundësi për risi përvec se paraqitjes së një platforme dhe vijimit me protesta. Për një arsye të thjeshtë, sepse për sa kohë bëhet fjalë për 30 qershorin zgjedhje vendore, të cilat nuk do të kryhen dhe nuk mund të kryhen pa opozitën dhe pa rregullat e lojës që po kërkon gjysma e popullsisë normalisht nuk mund të diskutojmë për axhenda të tjera. Në këto kushte, protesta, revolta popullore janë ajo që do të ndjekë në javët që vijojnë” u shpreh Duma.
