Në një konferencë për mediat, pas mbledhjes së jashtëzakonshme, kreu i qeverisë u shpreh se prodhimi i energjisë është më i ulët në krahasim nga ajo që shpenzon vendi, kështu i duhet të dalë në tregun ndërkombëtar. I pyetur nëse ka marrë për bazë planin 7 pikësh të kryedemokratit Basha, Rama tha se nuk jemi qeveria e Sudes.
“Unë do të doja që ju të verifikoni sa ka qenë çmimi i naftës në vitin 2013. Verifikojeni sa e kanë blerë, sa ka qenë në pikat e karburanteve të Shqipërisë, më lirë apo më shtrenjtë se sot, pastaj diskutojmë për të tjerat. Teoria hiq këtu e hiq atje ka një problem. Këto janë të gjitha para që ikin, me çfarë do t’i bëjë Shqipëria paratë nëse ulen të gjitha? Ne flasim për Gjermaninë e të tjerët, por bëjini pak mirë llogaritë sa paguajnë qytetarët atje? Sa sigurime paguhen atje për të marrë një shërbim shëndetësor më të mirë? Një pension? Bëjini edhe me këto krahasimet. Këto kërkesat me bëje rrafsh arkën e shtetit se shihemi nesër janë të Sudes. Ne nuk jemi atavizma të kohës së Sudes e Vehbiut, ne nuk jemi qeveria e Sudes dhe Vehbiut”, u shpreh Rama.
Duke u ndalur tek rritja e çmimit të bukës, kjo vjen sipas tij, për shkak të sistemit që është zgjedhur 30 vite më parë. Rama preku dhe rritjen e rrogave dhe pensioneve. Sipas tij, rritja e rrogave dhe pensioneve nuk mund të bëhet nëse rriten çmimet, por nëse rriten kapacitetet ekonomike të vendit tonë.
“Ne kemi zgjedhur këtë sistem 30 vjet përpara. Nëse marrim çmimin e bukës, nga viti ’90 e këtej. Ka ardhur në rritje, natyrisht rritja e çmimit reflekton tregun, kërkesën dhe ofertën. Nuk do të prodhojë bukë për ta mbajtur në magazinë. Këtë e kemi mbyllur. Nga ana tjetër, meqë rrisni çmimet; rrisni rrogat, nuk funksionon kështu. Rrogat nuk rriten se dua unë. Nuk ekziston një kryeministër që nuk do të rrisë rrogat sa herë kërkojnë qytetarët. Kjo është të thuash njësoj sikur në shtëpinë e vogël të thuash; pse nuk i jep më shumë lekë fëmijëve. Kështu ti duhet të marrësh borxh, ose të punosh më shumë. Pse Gjermania dhe Franca nuk i bëjnë rrogat nga 20 mijë euro për person? Që të rrisim kapacitetet ekonomike, duhet të punojmë më shumë. Ne nuk do i shmangemi as një zotimi që kemi marrë. Në 1 janar të vitit 2022, rroga minimale do shkojë 320 mijë lekë (të vjetra)”, përfundoi kryeministri Rama.
