Kryeministri Edi Rama ka pasur një komunikim me gazetarët shqiptarë, që fluturuan bashkë me të në Berlin, për vizitën e tij që kishte në Gjermani. Rama ka shmangur përgjigjen në lidhje me shpalljen “non grata” të Aqif Rakipit, në një kohë që djali i tij u fut në listat e PS-së.
“Të vijmë deri në Berlin dhe të flasim për kandidatët socialistë në Tiranë, më duket pak e sforcuar. Kalojmë te pyetja tjetër”, iu përgjigj Rama pyetjes për Orlando Rakipin.
Sipas Orlando Rakipit, babai i tij “është super i pastër” dhe nuk ka asnjë rekord kriminal. Ai u shpreh dje për mediat se është i gatshëm që të japë dorëheqjen, nëse vërtetohen akuzat ndaj Aqif Rakipit. “S’ka ndodhur ajo gjë në familjen tonë. Babai im është super i pastër. Mund ta shihni, s’ka asnjë lloj rekordi kriminal, apo nuk e di çfarë flisni”.
Nëse vërtetohen akuzat, a jeni gati të jepni dorëheqjen?
“Po shumë e vërtetë. I gatshëm jam, pse? Babai im është super i pastër. Babai im nga politika ka ikur për diçka skandaloze, kështu që nuk di çfarë të them më tepër”.
Në zgjedhjet e 25 Prillit, Orlando Rakipi ishte i renditur i 30-ti në listën e PS. Megjithatë ai arriti që të sigurojë një karrige në Kuvend, pasi mori vota preferenciale dhe theu herësin.
