Kryeministri Edi Rama, i cili para dy ditësh ndodhej në Bruksel, ka kërkuar fillimin e bisedimeve për Shqipërinë për t’u bashkuar me BE-në si pjesë e zgjerimit të Ballkanit Perëndimor për të forcuar sigurinë evropiane.
Edi Rama tha se do të ishte “çmenduri” për BE, nëse nuk do të pranonte rajonin, i cili është i kërcënuar nga ndikimi rus.
Kryeministri argumentoi se Tirana kishte luftuar fuqishëm kundër trafikimit të drogës dhe korrupsionit në gjyqësor, duke theksuar se Shqipëria është një vend kandidat serioz për të përmbushur ambiciet e Brukselit.
“Do të ishte shumë e çuditshme nëse Shqipëria nuk do të fillojë menjëherë negociatat, pasi ka bërë saktësisht gjithçka që i është kërkuar të bëjë”, tha në një intervistë, kryetari i qeverisë, duke theksuar se Serbia dhe Mali i Zi tashmë kanë filluar pranimin në bisedimet me BE. “Tani ajo që duam është thjesht të shpërblehemi për atë që kemi bërë – dhe që procesi të jetë i drejtë dhe të jetë i parashikueshëm”.
I kontaktuar nga Financial Times, Rama gjatë vizitës në Bruksel, tha se Tirana do të zhgënjehej nëse për të nuk hapeshin negociatat.
Rama i bëri thirrje Komisionit Evropian që të rekomandojë hapjen e bisedimeve të pranimit në kohë në mënyrë që krerët e BE ta miratojnë atë në samitin e tyre të qershorit. Ai vuri në dukje rëndësinë e Shqipërisë dhe vendeve fqinjë në uljen e flukseve të emigrantëve në bllok, duke shtuar se interesi dhe ndikimi i Rusisë në Ballkanin Perëndimor – ndonëse ndonjëherë ekzagjeruar – ishte e vërtetë.
“Ata [Moska] kurrë nuk hoqën dorë nga pikëpamja e rëndësisë gjeopolitike për rajonin – i cili nuk shihet me shumë interes nga BE, me përjashtim të kancelarit gjermane Angela Merkel”, – tha zoti Rama, i cili më tej tha: “Është çmenduri të mendosh se Ballkani Perëndimor mund të lihet pas dore, sidomos nga Evropa”.
Tirana është e prirur të përfitojë nga zgjerimi i BE pasi komisioni muajin e kaluar publikoi një strategji të zgjerimit të Ballkanit Perëndimor. Dokumenti sugjeroi se Shqipëria dhe pesë shtetet e ish-Jugosllavisë mund të bashkohen me BE brenda tetë viteve, por vetëm nëse ata përmbushën kushtet e vështira të tilla si zgjidhja e mosmarrëveshjeve të pazgjidhura dypalëshe dhe lufta kundër korrupsionit.
Disa shtete anëtare të BE janë skeptikë rreth perspektivave të anëtarësimit mes “lodhjes së zgjerimit” pas krizës financiare të vitit 2008, problemeve të borxhit të eurozonës dhe votimit të Brexit me Mbretërinë e Bashkuar. Udhëheqësit e bllokut do të takohen me homologët e tyre ballkanikë në një takim të posaçëm në Sofje në maj.
Rama argumentoi se vendi i tij ka bërë “përparim mahnitës” në prerjen e kultivimit të kanabisit dhe luftën kundër krimit. TIRANA TODAY
