Rama prezantoi zyrtarisht Pjerin Ndreun si kandidatin e PS-së për Bashkinë e Lezhës, në zgjedhjet e 30 qershorit. Teksa foli me superlativa për Ndreun, ai zbuloi se e ka shok prej vitesh, ndërsa e falenderoi se i ka hequr një dhimbje të madhe koke atij dhe bashkëshortes së tij, Linda Ramës.
“Unë dua të flas për Pjerinin, deputetin tuaj dhe shokun tim prej vitesh, i mençur dhe kokëderr. I përkushtuar dhe i vendosur për t’i shkuar punëve deri në fund.
E di mirë se çfarë më pret me këtë zotëri, vetëm ankesa dhe kërkesa, por asnjëherë kërkesë apo ankesë personale, gjithmonë për popullin. Ma kishte shprehur ambicien e tij kohë përpara, donte ta drejtonte Lezhën dhe unë i thashë; tregoje veten si deputet dhe të shohim të duan apo nuk të duan, se Lezha është edhe një hall më vete, mirditorë këtej, pukjanë andej, hajde ta gjesh se kë duan.
Por unë i jam falenderues Pjerinit, që më hoqi një dhimbje koke të madhe mua dhe Lindës, se të gjithë ju së bashku e propozuat si kandidat. Uroj që Pjerini të mbetet ky që është. Padiskutim që unë do ta mbështes Pjerinin për Lezhën, me çdo mundësi sepse besoj shumë fort te potenciali i jashtëzakondshëm që ka kjo zonë”, deklaroi Rama.
