Kryeministri Rama pati një përplasje të ashpër me deputetin e PD-së, Edmond Spaho, përsa i përket çështjes për Parkun Kombëtar të Butrinit. Kryeministri i është drejtuar opozitës, duke iu thënë se të gjithë, pavarësisht krahut që mbajnë në këtë parti, janë pjesë e një kopeje. Pasi sipas Ramës, flasin dhe argumentojnë të gjithë njësoj. Por teksa Rama fliste në Kuvend, Spaho ndërhyri.
“Profesor mos bërtit. Më ka marrë malli për ty, nuk e kam pritur që ti të marrësh flamurin e luftës me Amerikën. Unë e shikoj degradimin tënd si pjesë të qenit pjesë të një kopeje, ku budallallëku është sëmundje ngjitëse. Të mirëpres të bësh replikë me mua. Ju jeni ajo gjëja e ndarë përgjysmë”, tha Rama. Ndërsa Spaho mori fjalën dhe hodhi akuza për çështjen e Butrintit.
“E dini ju kush është Fondacioni shqiptaro-amerikan thotë?! Po e dimë shumë mirë. Është krijuar në vitin 1993. Kam qenë një prej përfaqësuesve shqiptarë në atë Fondacion.
Ndërhyn Rama: Epo je i rrjedhur atëherë!
“Që atëherë donin ta merrnin Butrintin, dhe nuk lanë asnjë gur pa lëvizur. Dhe BERZH na e tha që atëherë që jo, sepse nuk është skemë për ju, por për të bërë lekë”, tha Spaho.
Por Rama e përgënjeshtroi.
“Në vitin 1993, nuk është themeluar Fondacioni, por fondi. Janë 2 gjëra të ndryshme. Pra ka ndryshuar trajtë. Është një Fondacion jo fitimprurës, i financuar nga qeveria e SHBA-ve. Ju vini këtu dhe i referoheni si të ishte Ministria juaj e Kulturës, që e bëri disko kalanë e Lezhës. Sot shteti është në Gjykatë të Lartë, në proces akoma, për ato diskot dhe mejhanet që ju latë në kalanë e Lezhës. Ju jeni llumi. Dini vetëm të shani, të akuzoni”, tha Rama.
