Sot, kryeministri Edi Rama përfundon vizitën e tij në Kosovë.
Gjatë një konference për shtyp në Prishtinë, kreu i qeverisë falenderoi të gjithë për mikpritjen.
Ai theksoi se ndodhet në Kosovë për t’i dhënë mbështetjen e plotë, pas akuzave të ngritura ndaj Presidentit Hashim Thaçi dhe Kadri Veselit:
“Së pari, dëshiroj të bëj të qartë faktin se unë jam këtu për t’iu dhënë një mbështetje të plotë. Për t’i dhënë mbështetjen e plotë Kosovës dhe të gjithë përfaqësuesve politikë të saj në kushtet kur e dinë të gjithë… ka ndodhur diçka e rëndë dhe thellësisht e padrejtë.
Pothuajse për 2 dekada, në Kosovë procesi i vënies së drejtësisë për krimet e luftës është konceptuar, është mbështetur dhe është zhvilluar si një proces i pandashëm nga procesi i shtetndërtimit, i pajtimit ndëretnik, integrimit europian, i dialogut dhe normalizimit të marrëdhënieve me Serbinë.
Në këtë formë është formuluar edhe në strategjinë e zgjerimit nga BE.
Është krejt e kuptueshme që procesi i vështirë i pajtimit nuk është vetëm çështje e ballafaqimit me të kaluarën nëpërmjet drejtësisë, por edhe çështje e ndërtimit të së ardhmes nëpërmjet politikës”.
