Pas përfundimit të Këshillit Politik dhe deklaratave për mediat nga opozita parlamentare dhe jashtëparlamentare, ka reaguar kryeministri Edi Rama.
Ai me anë të disa postimeve në Twitter shprehet se Shqipëria është një vend i vogël për për sherre. Kreu i qeverisë u ka kërkuar palëve politike që të mendojnë më shumë për vendin, dhe të lënë mënjanë planet për sherrin e radhës.
Rama ka dalë në përfundimin se pengesa e opozitës nuk është as kushtetuese, juridike, po thjesht politike. Rama është i vendosur për votimin në 30 korrik në Kuvend të hapjes së listave dhe formulës së re të koalicioneve, pavarësisht kundërshtimit të opozitës.
“Shqipëria është shumë e vogël për sherre e mosdakordësira që zmadhohen nga hiçi dhe pushteti shkon e vjen po Shqipëria mbetet, prandaj mendoni pak më shumë për Shqipërinë dhe pak më pak për sherrin e radhës, se me sherr as keni fituar e as fitoni dot ju, po lëndohet Shqipëria!
Shkurt, pengesa juaj sot nuk është as kushtetuese,as juridike,po thjesht politike!Ju doni të merrni peng hapjen e listave e të zvarrisni procesin me alibira absurde.Por për këtë s’keni konsensus nga ne dhe mund ta bëni pa ne, siç bëtë kur dogjët mandatet e kur ikët nga zgjedhjet!
Ju doni lista të hapura 100%!Votimi i 30 korrikut nuk e pengon këtë.Jemi gati ta diskutojmë pa humbur asnjë ditë pas 30 korrikut. Ju doni koalicion parazgjedhor s’e nuk ndaheni dot nga LSI! As këtë s’e pengon votimi i 30 korrikut. Edhe këtë e zgjidhim po të keni vullnet pozitiv.
Miqve të PD u them shumë thjeshtë: Kuvendi në 30 korrik voton hapjen e listave dhe këtë jo ju, po as ne nuk e ndryshojmë dot, sepse ky është qartësisht vullneti i shqiptarëve edhe përtej partive që sot janë në parlament! Fatmirësisht risitë kushtetuese nuk pengojnë asgjë për ju!
