Kryeministri i vendit Edi Rama paralajmëroi se prokurori Arian Ndoja, për të cilin hodhi akuza se bashkëpunon me bandat kriminale dhe ushtron presion e shantazh mbi zyrtarët e administratës, nuk do t’i shpëtojë ndëshkimit.
Në takimin e përjavshëm me “platformën bashkëqeverisëse”, shefi i qeverisë u shpreh se Ndoja së bashku me prokurorët e gjyqtarët e tjerë të korruptuar, do të japin llogari për pasurinë e tyre.
Sipas tij, asnjë prokuror dhe gjyqtar nuk do t’i shpëtojë dot paratë e zeza të krimit dhe shpërblimet e majme të përfituara nga organizatat kriminale.
“Fatkeqësisht po shohim se pastrimi i llumit nga sistemi i drejtësisë ka dhe një efekt negativ, sepse shumë prokurorë e gjykatës që janë të zhytur deri në fyt, po e shfrytëzojnë pushtetin që ju jep ligji me moton ‘të kapin, çfarë të kapim’. Ata nuk kuptojnë që ndërtimi i sistemit të ri të drejtësisë kërkon kohë.
Ata që Vettingu i përjashton, do të rikthehen para prokurorëve dhe gjykatëse për të dhënë llogari për pasurinë e tyre, të jenë të sigurt. Edhe ata që bëjnë krime për të përfituar para të zezë, apo shpërblime të majme nga organizata kriminale, drejtësia mbi ta mund të vonojë dhe pak, por nuk do të harrojë”, deklaroi Rama.
