Rama ka njoftuar sot se javën e ardhshme do të shpallë qeverinë e re, ndërsa falenderoi të gjithë ministrat me të cilët ka bashkëpunuar deri më sot. Siç duket, pritjes i ka ardhur fundi, ndërsa ka zbuluar gjithçka në mbledhjen e fundit me kabinetin ku dhe paralajmëroi ‘furtunë’ ndryshimesh.
Ai njoftoi sot se Najada Çomo i ka dërguar një mesazh, përmes së cilit kërkon të lërë mandatin e deputetes që e fitoi në zgjedhjet e 25 prillit. Sipas Ramës, Çomo e ka marrë këtë vendim, nisur nga situata e pandemisë dhe kërkon që të japë ende kontributin e saj në spital.
Por kush do ta marrë mandatin e deputetit në vend të saj?
Sipas Kodit të ri Zgjedhor, nëse largohet një femër, vendin e saj e zë po ashtu një femër dhe në listën e kandidatëve, kjo radhë i takon kandidates për deputete Mimi Kodheli. Ajo u rendit e 21-ta në listën e deputetëve të PS-së për qarkun e Tiranës, që në total ka 36 mandate deputetësh.
“Qeveria e re do të shpallet javën e ardhshme, dhe ju normalisht do të vijoni punën deri në minutën e kalimit të detyrës, pa lënë asnjë minutë të shkojë kot. Fatmirësisht kemi një skuadër kampione, ku ka shumë zgjedhje për çdo rol dhe kampionati 4-vjeçar që ka nisur të nesërmen e zgjedhjeve të fundit, kërkon një kryesi efektive dhe një stol rezervash për të pasur mundësi për energjizimin e skuadrës. Ky është avantazhi jonë përballë kundërshtarëve. Ju falenderoj për këtë kohë sfiduese që kaluam së bashku, që dua ta mbani parasysh edhe nëse nuk do jeni në mbledhjen e parë të qeverisë së re”, u shpreh Rama.
