Kryeministri Edi Rama zhvilloi një takim elektoral në Tepelenë, aty ku nuk i kurseu thumbimet ndaj opozitës.
Për këtë të fundit, kreu i qeverisë tha se ajo ka vetëm vrer dhe urrejtje për shqiptarët:
“Ata bëjnë politikë të vjetër, të degraduar, që nuk ka vizion, program dhe as lidership. Opozita ka vetëm baltë, vrer dhe urrejtje e rrënim për shqiptarët. Ata duhet të jenë shqiptarë më datë 30 qershor.
Ata janë duke bërë një turp të madh antikombëtar. Opozita bën djegie, lëshon klithma dhe kanë për qëllim që të pengojnë hapjen e negociatave me BE-në. I tremben hapjes së negociatave, nuk e duan integrimin. Dy kapitujt e parë e që BE do na kërkojë është të lajmë hesapet me drejtësinë.
Çfarë nuk bëjnë, bëjnë rrëmujë. Ata vetëm shpifin dhe shajnë Shqipërinë në faqe të botës. Po i bëjnë Shqipërisë një të zezë që armiqtë e kombit e kanë bërë. Në Beograd është shpikur që shqiptarët janë njerëz me bisht. Këta e promovojnë këtë ide të tmerrshme. Kjo është fushatë për dinjitetin tonë kombëtar.
Kjo është një fushatë për vijimin e shtet-ndërtimit. Ata duan të marrin peng zgjedhjet. Shqipëria duhet t’u thotë mjaft fantazmave të së shkuarës. I kemi mundur përherë, s’jemi në garë. Unë kurrë nuk do iu tradhtoj”.
