Kryeministri Edi Rama ka reaguar në rrjetin social “Twitter” ndaj kërcënimeve që bëri presidenti i zgjedhur, Ilir Meta. Rama shkruan se vendi nuk ka nevojë për britma dhe kërcënime por për shtet, punë, mirëqenie. Kryeministri duket se i ka dhënë një këshillë Metës sepse e fton që të mos flasin me vete për veten e tij por me njerëzit e për njerëzit.
“Shqipëria s’ka nevojë për britma e kërcënime po për shtet, punë, mirëqenie. Ndaj mos flasim me vete e për vete po me njerëzit e për njerëzit”, shkruan Rama në Twitter.
Disa orë më parë Ilir Meta nga Fushë-Kruja, ka hedhur akuza të ashpra ndaj kryeministrit Edi Rama dhe kryetarit të grupit parlamentar të PS-së, Gramoz Ruçit. Meta në fjalën e tij tha se këta të dy i njeh shumë mirë edhe se sa trima janë. Meta tha se Ruçi u arratis në vitin 1996 për në Greqi, veshur me fustane grash.
Gjithashtu, Meta i ka thënë se “Fati i Janukoviçit të Ukrainës do u duket lule, sepse edhe nëse ka rënë kryetari i opozitës nuk bie rinia e Shqipërisë.”
