Kryeministri Edi Rama pohoi se nuk do të ketë asnjë hap pas për hartën e re gjyqësore, pavarësisht bojkotit të avokatëve që ka hyrë në javën e dytë të tij. Në kundërshtim të hartës së re gjyqësore, avokatët kanë vendosur të bojkotojnë pa afat seancat gjyqësore. Dhoma Kombëtare e Avokatisë vendosi këtë të mërkurë të bojkotojë pa afat seancat gjyqësore. Pas mbledhjes së zhvilluar me dyer të mbyllura, avokatët kanë vendosur gjithashtu të bojkotojnë për 10 ditë edhe seancat e masave të sigurimit.
Vendimi vjen në shenjë kundërshtimi të hartës së re gjyqësore të miratuar disa javë më parë nga Këshilli i Lartë Gjyqësor që shkrin 20 gjykata, mes të cilave edhe 5 Gjykata e Apelit, duke lënë vetëm 1 në Tiranë. Në kundërpërgjigje, Rama tha se mund të bojkotojnë sa të duan, por asgjë nuk ndryshon!
“Habitem që ka akoma nga ata që besojnë se me qeverinë që unë drejtoj, mund të flitet me gjuhën e bojkoteve. Ne këtu jemi. Kush ka diçka, le të vijë e të flasë. Të bojkotojnë sa të duan, kjo nuk ndryshon. Shqipëria nuk mund të mbetet peng e të kaluarës së vet.
Shqipëria është një vend i vogël, për të pasur zyra dhe institucione të panumërta. Harta është ajo e konsultuar gjatë. Kush i bie ndesh, është në të drejtën e vet. Pengmarrja e qytetarëve për të bërë qeverinë të ndryshojë qëndrim është e pamoralshme, e shëmtuar dhe e padobishme. Nuk ka asnjë shans të ketë sukses”, tha Rama.
