Në një takim elektoral në Urën Vajguore, ku prezantoi kandidaten për kryetare bashkie, Juliana Memaj, kryeministri Rama lëshoi një lum akuzash ndaj PD-së, duke trumbetuar se ata kanë frikë nga zgjedhjet. Sipas tij, reforma në drejtësi i ka frikësuar, ndaj kanë zgjedhur që të bërtasin në rrugë. Me tone ironike, Rama shtoi më tej se e vetmja alternativë e tyre është dhuna e molotovi.
“Sepse nuk ma ha mëndja se është e vështirë për kedo nga ju të kthejnë kokën pas, të kujtojnë për Urën Vajgurore 4 vjet më parë. Të ecë me mendjen dhe të numërojë të gjithë hapat që kemi bërë në 4 vite, ku pa asnjë diskutim se kemi përfunduar rrugën tonë, këmi bërë një progres që nuk ishin bërë në vitet e marra së bashku.
Siç janë realitet shumë punë të bëra këtu, ku kryetarja e bashkisë ka meritën kryesore. Dhe falë së cilës padyshim meriton edhe një herë mbështetjen tuaj. Natyrisht e dini mirë se këto zgjedhje çështja nuk është kush do jetë kryetarja apo kryetari.
Çështja është si ne të gjithë së bashku, do ta ndajmë të ardhmen nga e shkuara, si do zgjedhim mes rrugës të ideve, programeve dhe rrugës së baltës, të sherrit. Si ne do të zgjedhim vendin normal demokratik dhe llogarive të pushtetit të atyre që përmes dhunimit të demokracisë, synojnë të kthejnë mbrapsht kohën, të marrin zvarrë jetën demokratike të vendit dhe të varrosin reformën në drejtësi.
Ata kanë frikë nga zgjedhjet, kanë frikë të dalin para popullit dhe të kërkojnë të gjykohen për çfarë ofrojnë. Ata kanë frikë të ballafaqohen, por një gjë është pak, po e sigurtë. Ata mund të vendosin të vrasin veten politikisht, ata nuk vendosin asgjë tjetër për ne dhe për Shqipërinë që duam.
Ju besoj e dëgjoni edhe nëpër ekrane, kafene, zërin e disave që pa të keq thonë: si mund të bëhen zgjedhjet pa opozitën? Nëse opozita kryesore sot mungon në zgjedhje, dhe kjo si rezultat i pengesës që i është vënë nga ana jonë, atëherë zgjedhjet do ishin antidemokratike.
Ama shikojeni se çfarë rrumpalle bëhet demokracia në këtë vend, nëse zgjedhjet kthehen nga e drejta për tu gjykuar, në të drejtën e politikanëve të partive për tu paraqitur kur tu teket atyre”.
