I ftuar mbrëmë në emisionin e gazetarit Ilir Barbaramo, analisti Ylli Rakipi tha se Rama ka shpallur një ‘luftë’ personale me të.
“Edi Rama ka blerë në mënyrë të qartë pjesën më të madhe të medias shqiptare, është një luftë që tashmë po kthehet në një luftë personale. Ai ka dalë dhe publikisht dhe më ka përmendur emrin, ai e ka personale, po sigurisht që dhe unë e kolegët e mi do e kemi personale. Dy duar për një kokë jam, le të vazhdojë, është punë e tij, po unë kam lindur në këtë vend”, tha Rakipi.
I pyetur nga moderatori se çfarë nënkuptonte me ‘dy duar për një kokë janë’, Rakipi përmendi vrasjen e gazetarit Jamal Khashoggi, pas së cilës dyshohet se fshihet princi i Arabisë Saudite.
Ndër të tjera, analisti shprehet se nuk ndihet i sigurtë, por pavarësisht kësaj thekson se nuk do të largohet nga vendi.
“Në të gjitha pikëpamjet, nuk ndihemi të sigurt, unë jetoj këtu dhe do vdes këtu ku kam lindur, do apo nuk do naltmadhëria e tij Edi Rama. Më thuaj një rast tjetër që të sulmohen në këtë mënyrë gazetarët? Nuk mund të krahasohemi me vitin 1997 kur bandat hynë dhe dogjën redaksinë e Nikollë Lesit, po atëherë nuk kishte shtet fare. Nëse pranojmë që është edhe sot kjo gjendje, është punë tjetër.
Është njësoj si Enver Hoxha që merrte si shembull krizën e vitit 1938 për të masur sukseset e veta, atëherë le të marrim dhe ne shembull 1997. Fajet më të mëdha janë te ata që e kishin pushtetin”, deklaroi Rakipi.
