Kryeministri Edi Rama ndodhet sot në Librazhd nga ku është konfirmuar kryebashkiaku aktual Kastriot Gurra si kandidati i socialistëve, në garë për një mandat të dytë.
“Unë dua shumë të falënderoj kryeministrin Rama por së fundmi dua ta falënderoj për një vendim që vetëm burra shteti e marrin, një kancer që kishim në katet e para të pallateve tona e në çdo kryqëzim, një kancer që shqetësonte familjet tona, nënat tona, heqja e llotove nga qyteti i Librazhdit dhe nga gjithë Shqipëria. Pavarësisht se jemi një qytet i vogël, 20 lloto ishin në Librazhd”, tha Gurra.
I pranishëm është edhe deputeti i zonës Taulant Balla. Ky i fundit më herët vlerësoi punën e kryebashkiakut aktual.
“Faleminderit Kastriot për punën që ke bërë, që nuk na theve besimin. Ka ende punë për të bërë. Ne duhet ta vijojmë punën tonë. Kush shpreson ende te ato që thotë Luli dhe Mona, zgjedhjet e 30 qershorit do të bëhen”, tha Balla.
Ndërkaq, Balla u ndal edhe tek incidenti i ndodhur gjatë mbërritjes së tyre në Librazhd, pasi disa mbështetës të PD-së u kishin bllokuar rrugën.
“Dua tu kthej përgjigje edhe atyre që bënë lajmin e radhës. Ky Luli ynë këtu Bujari (Bujar Vreto, kryetari i PD) kishte datë të bllokonte rrugën. Ata nuk janë qytetarët”, deklaroi Balla.
