Në konferencën e përbashkët në Bruksel me shefin e NATO-s, Jens Stoltenberg, kryeministri Edi Rama kërkoi që të përfshihet edhe Kosova në partneritetin për paqen. Sipas kryeministrit, për shkak të vështirësisë me sigurinë është e rëndësishme që të konsiderohet pozita e Kosovës. Në konferencën për mediat me Stoltenberg, kreu i qeverisë shqiptare tha se Shqipëria është krenare për rolin e saj në rajon.
“Është kënaqësi e madhe që jam këtu, dhe të ndaj me ju disa opinione pas Samitit të Madridit, që ishte një moment historik për Aleancën në këtë moment shumë të rëndësishëm. Jam krenar që Kuvendi i Shqipërisë u bë një prej të parëve për ratifikimin e protokollit të anëtarësimit të Finlandës dhe Suedisë. Ne qëndrojmë në solidaritet të plotë me Ukrainën, dhe është e padiskutueshme mbështetja jonë për integritetin territorial dhe sovranitetin e Ukrainës. Ne duhet të parandalojmë çdo përshkallëzim dhe çdo ndikim të keq që të kthehet në problem për rajonin tonë. Në kapacitetin tonë si vend i NATO-s dhe vend kandidat për në BE, ne do të vazhdojmë ta luajmë rolin tonë të paqes dhe stabilitetit në rajon. Ne besojmë se është tejet e rëndësishme që të vijojmë një dialog të përhershëm me të gjitha vendet e Ballkanit Perëndimor që përfshin Serbinë, që nuk është pjesë e aleancës tone, por është pjesë e rajonit. Unë ripërsëris nevojën për të përfshirë Kosovën në partneritetin për paqen, edhe pse e di që ka disa probleme politike nga disa vende anëtarë. Dhe së fundmi e vlerësoj shumë disponibilitetin tuaj për të shtuar një vlerë tjetër të rëndësishme në infrastrukturën dhe logjistikën e aleancës, me një bazë të flotës detare të fjalës së fundit. Faleminderit shumë edhe për këtë dhe është kënaqësi gjithmonë të kthehesh këtu. Është gjithnjë e dobishme të kthehesh me energji të plota”, tha Rama.
Stoltenberg vlerësoi mbështetjen e Shqipërisë për Ukrainën. Ai u ndal edhe tek vizita e kryeministrit Edi Rama në Ukrainë, të cilën e cilësoi dëshmi të rëndësishme të solidaritetit. “Unë mirëpres mbështetjen e Shqipërisë për Ukrainën, si dhe angazhimin tuaj të fundit për ndihmë humanitare, gjithashtu edhe vizita juaj e fundit në Ukrainë ishte një dëshmi e rëndësishme solidariteti. Kështu që kryeministër Rama, faleminderit edhe njëherë për kontributin e Shqipërisë për sigurinë tonë të përbashkët, pres me padurim të vazhdoj të punoj me ju. Kështu që edhe njëherë mirëseerdhët”.
