Kryeministri Edi Rama ka ndarë një lajm shumë të mirë me të gjithë qytetarët. Teksa ka ndarë një foto të dy infermierëve në rrjetet sociale, Rama shprehet se gjatë 24 orëve nuk është paraqitur asnjë i sëmurë me Covid në dyert e spitalit Infektiv.
Ndër të tjera, kreu i qeverisë tha se kjo nuk kishte ndodhur që nga marsi i vitit të kaluar, koha në të cilën filloi pandemia në vendin tonë.
”LAJM I BUKUR. Sapo kanë kaluar 24 ORËT E PARA pa asnjë të sëmurë me Covid të paraqitur në dyert e Spitalit Infektiv qysh nga marsi i vitit 2020’’, shkruan Rama në rrjetin social, Facebook.
Kurba e koronavirusit në vend mbetet e ulët pasi 24 orët e fundit janë regjistruar 67 raste të reja, nga 2.728 testime të kryera. Aktualisht, në spitalet COVID po trajtohen 111 pacientë.
Ndërkohë, edhe procesi i vaksinimit po ecën me ritme të shpejta, teksa gjatë 24 orëve të fundit janë kryer 13.467 vaksinime, ndërsa në total janë bërë 585.693 vaksina.
