Pas lajmit që u shpërnda dje në media se Gjykata e Shkallës së Parë në Dubrovnik ka vendosur ekstradimin e Ismail “Ballist” Morinës drejt Serbisë ka pasur shumë reagime nga zyrtar të lartë dhe persona të sportit. Me sa duket kryeministri Rama e ka parë të nevojshme ndërhyrjen e tij. Rama ka nisur kontaktet me aurotitetet kroate për çështjen e Ballist Morinës, ndonëse çështja është apeluar.
Në njoftimin e FSHF-së thuhet se presidenti Armand Duka dhe kryeministri Edi Rama janë në kontakt të vazhdueshëm me autoritetet kroate për zgjidhjen përfundimtare të procesit.
Njoftimi i FSHF:
FSHF vazhdon të ndjekë me shumë intensitet dhe angazhim maksimal procesin për mos ekstradimin e Ismail Morinës drejt Serbisë. Presidenti Armand Duka ka patur një komunikim intensiv me Kryeministrin e vendit Edi Rama për këtë problem. Kreu i Ekzekutivit së bashku me Presidentin e FSHF kanë marrë kontakt të vazhdueshëm edhe me autoritetet kroate për zgjidhjen përfundimtare të procesit. Gjatë gjithë mbrëmjes së djeshme dhe paradites së sotme, por edhe në vijim jane parë të gjitha mundësitë dhe hapësirat ligjore për të mbrojtur një cështje të tillë.
