Duke marrë parasysh ankesat e shumta që kanë ardhur nga partitë e vogla, përfshirë edhe Lëvizjen Socialiste për Integrim, kryeministri Rama i cilësoi të gjitha këto si përpjekje për pazare politike.
Pavarësisht faktit se LSI dhe tashmë ish-kreu i saj, Ilir Meta (i sapozgjedhur president) nuk e kanë shfaqur hapur pakënaqësinë ndaj marrëveshjes Rama-Basha, duket se i frikësohen një bashkëqeverisje midis tyre pas zgjedhjeve.
Duke iu referuar kësaj frike, Rama tha se të gjithë ata që lëshojnë akuza mbi marrëveshjen PS-PD, iu janë prishur pazaret dhe e kanë bërë politikën si stacion autobusi.
“Mbyllni volumin e televizorit dhe shikoni fytyrat e tyre. A iu duken si fytyrat që nuk dalin në pazar dhe mendoni se nuk shkojnë në pazare? Në fakt atyre u janë prishur pazaret, që nga ata që bëjnë mendjedhënësit nëpër televizione dhe gënjejnë, deri tek ata që janë pas tyre e deri tek ata që janë mësuar që ta bëjnë politikën si stacione autobusi”, tha Rama nga qyteti i Korçës.
25 qershori dhe PD
Rama siguroi se Partia Socialiste nuk mund të manipulojë dot zgjedhjet. Këtë gjë sipas tij, nuk e ka bërë as në të kaluarën. Ai i kërkoi Bashës, që të mos ankohet për rezultatin e zgjedhjeve pas 25 qershorit, pasi ia ka dhënë të gjitha instrumentet në dorë.
“Dëgjoja mbrëmë lloj-lloj personazhesh, jo pazar, jo u nda në dysh qeveria, jo e bënë për interesa personale. E kundërta është e vërtetë. Ne iu thamë “Ça halli keni? A doni më shumë? Merrini të gjitha! Merrni edhe më shumë, s’ka asnjë problem. 1 muaj është! Por, jo, t’i merrni siç i kërkoni, të ikim ne dhe të vini ju.”
PS nuk është shquar për manipulime zgjedhjesh, ata që i kanë bërë në të kaluarën thonë që “do t’i bëjmë ne. Domethënë të humbësh një betejë se s’kishte si e fitoje dhe të thuash që na e vodhi mafia”. Kjo është “hapu dhe se nuk di ku të futem.” Kur të mbarojnë zgjedhjet të mos kemi më llafe më, “jo na i vodhën, jo na i morën”. Do të vendosim njerëz me integritet, njerëz apolitikë. Pasi të mbarojnë zgjedhjet dhe pasi të dalë rezultati nuk ka më fjalë që “jo na i morët, jo na i nxorët”. Njerëzit hyjnë në një fushatë me mundësinë për të garuar dhe për të fituar. PD dhe ata që quhen të djathtë do të mbeteshin të papërfaqësuar pa pjesëmarrjen e tyre në zgjedhje. Ne themi që edhe ata që janë me PD të votojnë PS se ne dimë të bëjmë shtet”, shpjegoi ai.
Qeveria teknike
Rama siguroi se qeveria teknike do të bëjë të mundur garantimin e procesit zgjedhor, pasi në të do të vendosen njerëz me integritet.
“Këta që do vijnë në detyrë do të jenë aty për të mos bërë as tenderë, as emërime as shkarkime, por këta do të kujdesen për gjithë procesin. Unë kisha nxjerrë një urdhër më parë dhe me urdhrin tim ishin bllokuar të gjitha këto. S’ka asnjë procedurë të re që bëhet në periudhë zgjedhjesh. Nuk do të bëjmë më si Saliu, nuk mund të përdorim administratën për të mposhtur kundërshtarin. Ne do t’i mundim ata me dashurinë që kemi për këtë vend. Në këtë rast kemi bërë gjënë e duhur për të gjithë, se dëgjova një prej Korçe, që “ja ata do të marrin këtë dhe atë. Jo, ata do të jenë aty që administrata të mos kthehet në një instrument abuzimi kundër kundërshtarëve që s’kanë administratë. Tani u bë kështu për 30 ditët e fushatës, se çdo të ndodhë më pas këtë do ta vendosin shqiptarët”
Forcë e parë politike
Rama ironizoi Lëvizjen Socialiste për Integrim, dhe Partinë Demokratike të cilat kanë deklaruar se duan të dalin forcë e parë. Sipas Ramës, PS pas 25 qershorit, fiton 71 mandate.
“LSI dëshiron të dalë forcë e parë, PD do të dalë forcë e parë, edhe ne duam të dalim forcë e parë. Ne duam ta fillojmë me 71 vota për PS-në që nuk do të thotë aspak se ne duam më shumë pushtet, do të thotë që Shqipëria të mos humbasë kohë se ka humbur shumë në këto çerek shekulli”.
