Kryeministri Edi Rama komentoi ditën e sotme në Kuvend, aktakuzën e ngritur për Presidentin e Kosovës Hashim Thaçi dhe Kreun e PDK-së Kadri Veseli.
Me tone të ashpra, Rama theksoi se Serbia nuk ishte viktimë, por ishte agresori:
“Pse duhet të flasin për pafajësinë e UÇK-së? Kosova ka dhënë një shembull aq të veçantë sa përpiquni ta gjeni!
Lexon fletërrufenë dhe thua o Zot, për ça flitet?
Serbia nuk ishte viktimë, por ishte agresori!
Më vjen keq kur dëgjoj njerëz me zë të fortë në mjedisin publik që me thënë të drejtën nuk e fshehin dot se edhe iu vjen mirë për këtë që ndodhi.
Rikujtojmë se qysh prej fillimit… 21 vjet, drejtësia ndërkombëtare në Kosovë ka hetuar gjerësisht çdo bëmë të Ushtrisë Çlirimtare të Kosovës për të gjetur atë që nuk ekziston.
Nuk është përshtypje personale, është realitet institucional.
Qysh prej qershorit të 1999 kur tanket e NATO-s u futën në Kosovë në ditën e madhe, krimet e luftës në Kosovë janë hetuar nga Tribunali i Hagës, nga EULEX, nga gjykatat e përziera.
Pas 21 vitesh del një tekst që në mënyrë indinjuese vendos një shenjë barazie mes viktimës dhe xhelatit. Në fakt nuk është vendosur shenjë barazimi, por është përmbysur peshorja mes viktimës dhe xhelatit në luftën e Kosovës.
Po të shohësh në pasqyrë Gjykatën Vendore të Kosovës dhe Serbisë lexon faktin se duket sikur në Kosovë është lëshuar ofensiva e agresionit dhe në Serbi janë thjesht viktima të agresionit.
Pasi nëse në Kosovë odiseja e drejtësisë ndërkombëtare vazhdon prej 21 vjetësh, në Serbi dhe në veçanti për krime ndaj Kosovës… zero!”
