Duket se dueli Basha-Rama nuk ka fund. Kryeministri ka zgjedhur të mos heshtë, por të “përveshë mëngët” ndaj kreut demokrat Basha. Ai e cilëson kreun e PD-së si një mashtrues, por që të vërtetat gjithmonë dalin në shesh.
Përmes një postimi në Twitter, ai i kujton Bashës se është kapur me “presh në dorë”. Po kështu Rama ia ka kthyer përmes ironisë, edhe në lidhje me shprehjen e famshme se ai është artist.
Pak më herët, kryedemokrati akuzoi kryeministrin Rama se ka ngritur një shtet privat, që funksionon jashtë Kushtetutës dhe ligjeve. Basha adresoi akuza edhe ndaj Arta Markut.
Kreu i opozitës akuzoi Ramën, se ka krijuar një shtet paralel në Shqipëri, që i shërben për të mbrojtur të afërmit e tij dhe zyrtarët e lartë të lidhur me mafien. Basha tha se ekzistenca e këtij shteti paralel, u pranua dje nga vetë Rama, i cili foli për një strukturë të posaçme hetimore që i shërben atij.
