Kryeministri Edi Rama ka vijuar të kërcënojë opozitën me burg. Në seancën e sotme plenare kryeministri ka krijuar edhe diversion brenda radhëve të Partisë Demokratike, ku i adresoi një këshillë kreut të saj, Lulzim Basha që shumë shpejt selia blu do ta shesë dhe do ta nxjerrë në rrugë.
“Lulzim ma dëgjo një këshillë sot këtu përpara të gjithëve. E di si do të shkojë kjo punë. Mbaje mend që në fund këta do të rrahin ty. 7 herë baras me 42. Do të të rrahin ty, do t’i bien samarit në vend të gomarit”, iu adresua Rama Lulzim Bashës nga foltorja e Parlamentit.
Pas kësaj këshille për Bashën, Rama kërcënoi hapur gjithë eksponentët e selisë blu, të cilët sipas tij, i pret burgu bashkë me Bashën pasi ta largojnë nga Partia Demokratike.
“Ty do të nxjerrin këta në rrugë të madhe. Dhe atje si ta kesh fatin bashkë me këta. Dhe atje bashkë me këta ka një stacion dhe stacioni është drejtësia. Dhe stacioni do të tregojë se kush jeni ju dhe kush jemi ne”, përfundoi ai.
Përgjatë javëve të fundit mazhoranca ka nisur një aksion ndaj elementëve të opozitës duke goditur zyrtarë të saj për korrupsion. Si fillim Rama e ka nisur me Lëvizjen Socialiste për Integrim, ku njëri prej zyrtarëve të saj, ish-drejtori i Autoritetit Rrugor Shqiptar përfundoi pas hekurave. Pas LSI-së siç duket radhën e kanë eksponentët e Partisë Demokratike.
E për këtë arsye, Rama si duket se po i jep Lulzim Bashës një këshillë të fundit përpara se vetë kryedemokrati të jetë koka e prerë që PD mund t’ia shesë drejtësisë, të paktën sipas aludimit të fundit të kryeministrit, i cili lëshoi edhe një mesazh për të gjithë drejtuesit e lartë të PD-së që kanë abuzuar me pushtetin, se i pret “stacioni i fundit”.
