Kryeministri Edi Rama vuri në dukje të mërkurën në një konferencë për media, se ndërtimet e reja kaluan me sukses testin e tërmetit.
“Goditja sizmike nuk ka dhënë impakt në godinat e reja. Kemi pasur dyshim se në gjithë këtë zhvillim të 30 viteve, për shkak edhe të shumë abuzimeve dhe shumë shkeljeve në lejet e ndërtimit të bëra, do të kishim një vunerabilitet të konsiderueshëm në rast të një tërmeti. Për fat të mirë, godinat kanë kaluar një test me sukses, sepse të gjitha dëmet, qoftë të konsiderueshme, qoftë sipërfaqësore, janë regjistruar në godina të vjetra, apo në shtesa të godinave të vjetra, apo godina të viteve ’90. Në periudhën e mëpastajme nuk janë shënuar dëme, qoftë edhe sipërfaqësore”, theksoi ai.
Rama theksoi gjithashtu se ky është një lajm i mirë në gjithë morinë e vështirësisë së madhe që kemi kaluar, dhe pasojave që duhet të përballojmë.
“Kemi vendosur të bëjmë përshpejtim të procedurave për leje ndërtimi, për riparimin e ndërtesave që duhen bërë ndërhyrjet përkatëse pas tërmetit. Do ta marrin lejen pa paguar asnjë taksë dhe vetëm brenda 5 ditësh”, konfirmoi ai.
Kryeministri vuri në dukje se akti normativ i buxhetit të këtij viti garanton fondin rezervë për situatën emergjente, dhe po kështu parashikon përjashtimin nga taksa e ndikimit në infrastrukturë te të gjithë investimeve mbi banesat e dëmtuara si pasojë e tërmetit.
“Nisur nga fakti se Prokurimi me vlerë të vogël janë procedura të thjeshtuara që bëhen brenda një afati të shkurtër, kemi vendosur që përjashtimisht, të lejohen autoritetet kontraktore, dhe vetëm duke referuar familjeve të prekura nga tërmeti, për të plotësuar nevojat e tyre për procedura prokurimi në vlerë të vogël, deri në 10 milionë lekë të vjetra. Sepse ka shumë nevoja që kushtojnë pak në raport me volumin e përgjithshëm, por kanë një impakt të rëndësishëm për familjet”.
Ai tha se është vendosur gjithashtu që të sigurohet një ekzaminim i plotë edhe për ashensorët, për të cilët personat përgjegjës nuk disponojnë një dokumentacion të plotë.
“Objektivi është që të sigurohemi se ashensorët në përdorim, plotësojnë kriteret dhe nuk janë të prekur pas tërmetit. Një vendim me impakt afatgjatë, që parashikon masa detyruese për ndërtuesit, investitorët, për të lidhur një kontratë sigurimi me afat 10-vjeçar me blerësit e apartamenteve”, tha ai.
Kjo kontratë mbulon dëmet e të tretëve, ku për shkak të tërmetit apo defektit në ndërtim, ndërtimi shembet apo paraqet rrezik shembje apo defekte të tjera serioze. Projektligji për disa shtesa dhe ndryshime në ligjin për kontrollin e sigurisë së ndërtimit, përcakton se entet do të kryejnë oponencën teknike mbi çdo godinë publike dhe private me akses publik, pavarësisht nga vlera e ndërtimit. Edhe për ato ndërtesa me mbi 50 vite të ndërtuara.
