Kryeministri Edi Rama menjëherë pas votimit të Gramoz Ruçit në krye të Kuvendit të Shqipërisë tha se “ambicia jonë që kuvendit ti kthehet dinjiteti i nëpërkëmbur për katër vjet”. Kryeministri u shpreh se pas zgjedhjes së Ruçit radha është e zyrtarizimit të qeverisë “Rama 2”. E me sa duket kjo datë do të jetë 11 shtatori.
Rama ka pohuar se “Të hënë paraqesim kabinetin dhe programin. Falënderoj Presidentin e Republikës që ka reaguar duke bërë të lehtë nga ana procedurale rrugën drejt së hënës. Do të mundohemi të reagojmë ndaj çka do të jetë racionale dhe në përputhje me programin tonë dhe shpresojmë që opozita të jetë në këtë sallë një sfidë e vërtetë për ne dhe jo boshkllëk programi.
Këtë gjë e ka pohuar edhe kreu i parlamentit Gramoz Ruçi, në seancën e sotme. Ai tha se më 11 shtator në seancën plenare, kryeministri do të paraqesë programin dhe përbërjen e kabinetit qeveritar.
“Më 11 shtator do jetë dita kur kryeministri do të paraqesë në Kuvend programin politik dhe përbërjen e kabinetin qeveritar”, tha Ruçi.
