Kryeministri Edi Rama ka lënë të kuptohet se Armando Subashi do të rikandidojë për një mandat të dytë në bashkinë e Fierit, për zgjedhjet lokale.
Teksa zhvilloi një aktivitet në Libofshë të Fierit në kuadër të projektit “100 fshatrat”, kryeministri tha se vota në zgjedhjet e qershorit për kandidatët e PS-së do të jetë një mundësi e re për rilindjen rurale.
“Patjetër që edhe ajo u tha nga kryetari i bashkisë si nevojë strategjike e zhvillimit të zonës, dalja në det, është në vëmendjen tonë dhe do të jetë një nga projektet që do të zhvillojmë së bashku gjatë mandatit të dytë të kryetarit të bashkisë.
Kemi identifikuar si potencial të rëndësishëm për zhvillimin e këtyre fshatrave, sheshet e këtyre fshatrave, jo vetëm për ata që jetojnë këtu, por edhe ata që do të vijnë këtu për të pirë një kafe apo gotë raki. Kur duan të qëndrojnë ku? Këtë duhet ta zgjidhim. Qeveria dhe programi ‘100 fshatrave’ ka fonde grant për bujtina”, tha Rama ndër të tjera, duke konfirmuar rikandidimin e Subashit.
