Kryeministri Edi Rama zhvilloi një takim bilateral me kryeministrin e Kinës, Li Keqiang, gjatë zhvillimit të samitit 16+1 mes vendeve të Europës Juglindore dhe Kinës. Gjatë këtij takimi, Rama i kërkoi homologut të tij përshpejtimin e procedurave që do të lejonin hyrjen e disa produkteve ushqimore në tregun kinez.
Nga ana tjetër, Rama duke iu referuar 70 vjetorit të vendosjes së marrëdhënieve diplomatike mes dy vendeve, i kërkoi kryeministrit Li edhe heqjen e ndërsjelltë të vizave mes dy vendeve, ç’ka do të nxiste jo vetëm rritjen e numrit të turistëve kinezë në Shqipëri, por edhe rritjen e shkëmbimeve tregtare mes dy vendeve.
Duke iu referuar zyrës së kryeministrit Rama, Li Keqiang konfirmoi heqjen e çdo barriere për importin e verës, mjaltit dhe vajit të ullirit shqiptar. Gjithashtu, kreu i qeverisë kineze premtoi ndërmarrjen e hapave të nevojshme për heqjen e vizave, si dhe njohjen e ndërsjelltë të diplomave universitare.
