Kryeministri i vendit Edi Rama deklaroi se pensionistët do t’i marrin lekët që iu janë mohuar. Ndërsa theksoi se ata duhet t’i drejtohen platformës bashkëqeverisëse për të zgjidhur problemin e tyre.
Gjatë takimit të përjavshëm me njerëzit që kanë gjetur zgjidhje, kreu i qeverisë iu bëri thirrje të gjithë pensionistëve, të cilëve iu është përllogaritur gabim pensioni, që të mos mundohen të shkojnë në zyrat e Institutit të Sigurimeve Shoqërore, por t’i drejtohen platformës.
“Ne jemi shumë të angazhuar për t’i ardhur në ndihmë të gjithë pensionistëve, që kanë nevojë për rillogaritjen e pensionit. E mira e kësaj pune është që pasi bëhet llogaritja e pensionit do vendoset pensioni në shumën e drejtë, merret gjithë diferenca lekë dore.
Kështu që të gjithë ato lekë të mohuara në disa vite vijnë menjëherë, dhe kjo e shlyen deri diku detyrimin moral të shtetit ndaj pensionistëve. I bëj thirrje të gjithë pensionistëve që kanë një problem, të mos mundohen të shkojnë në zyrat e Institutit të Sigurimeve Shoqërore, por t’i drejtohen platformës bashkëqeverisëse, pasi ne zgjidhim me shumë kënaqësi problemin e tyre”, tha Rama.
