Kryetari i Lëvizjes Vetëvendosje, Albin Kurti, ka komentuar deklaratën e kryeministrit Edi Rama, që tha se është lajthitje marshimi i VV më datë 28 nëntor, që do të bëjë në Tiranë. Ai tha se për të kjo është një çështje me rëndësi, dhe aspak lajthitje. Madje, ai e cilësoi këtë si një detyrëm, për të bërë aktivitete publike për bashkim.
“Lajthitje?” Çfarë të them unë, tani mendoj se nuk është lajthitje. Nuk di çfarë të them. Të bësh aktivitete publike për bashkim, kjo është gati detyrë”, tha Kurti në “Open”.
Eni Vasili e ka pyetur se përse Lëvizja Vetëvendosje do të bëjë marshim më 28 nëntor në Tiranë.
“Qendra e Vetëvendosjes në Tiranë nuk është as pozitë as opozitë, ajo është rregjistuar si OJF. Ne e kemi frymën e përbashkët, por nuk dirigjojmë dhe drejtojmë njëri-tjetrin. Ne jemi demokratë, ne e duam bashkimin kombëtar dhe sa më shumë aktivitete më 28 në frymën e bashkimit, aq më mirë është. Të zbatohen marrëveshjet që janë midis Kosovës dhe Shqipërisë”, u shpreh Kurti.
