Pas vendimit të Bundestagut gjerman, për t’i hapur dritën jeshile anëtarësimit të Shqipërisë në BE, vendim që pritet të vuloset më 17/18 tetor nga Këshilli Evropian, mediat holandeze shkruajnë se Holanda nuk tërhiqet nga ‘JO-ja’. Më konkretisht: “Parlamenti holandez nuk do të ndryshojë qëndrim për bllokimin e negociatave për anëtarësimin e Shqipërisë në BE”.
Tashmë është e qartë se Holanda nuk do ta japë aprovimin e saj për çeljen e procesit të negociatave të Shqipërisë me BE, as në muajin tetor.
Ministri i Jashtëm holandez, Stef Blok, gjatë një seance në Komisionin për Çështjet Europiane në Parlamentin holandez, ka deklaruar se vendimi i qeverisë holandeze nuk ka ndryshuar shumë nga ai i muajit qershor, kur u refuzua hapja e negociatave për vendin tonë.
Ky njoftim me mjaft peshë, ka sjellë edhe reagimin e kryeministrit Rama. Gjatë një komunikimi në rrjetet sociale me qytetarë të ndryshëm, Rama ka thënë se në rast të një ‘Jo’-je nga Holanda, atëherë ky vendim nuk do të ketë lidhje me Shqipërinë, por me problemet e brendshme të këtij vendi.
“Unë s’e di a do thotë Jo, a s’do thotë Jo, po di që po tha Jo, s’ka asnjë lidhje me ne, por me punët e tyre të brendshme”, shkruan Rama në përgjigjen e tij, ndaj pyetjes së një qytetari në profilin e tij në “Facebook”.
