Kryeministri Rama, e ka nisur mbledhjen e sotme të grupit parlamentar me një sqarim lidhur me sa ndodhi në Samitin e Berlinit. Ai sqaroi të gjithë zërat dashakeq që qarkulluan, duke bërë me dije se samiti nuk kishte asnjë lidhje me negociatat.
“Nuk kisha parë kurrë më parë dezinformim, keqinformim më të madh mediatik dhe politik, sesa tërësia e marrëzirave dhe ligësive që u shoqëruan dhe pasuan në pasqyrat e mediave në Tiranë dhe Prishtinë. Samiti nuk kishte asnjë lidhje me negociatat, asnjë samit për integrimin e Ballkanit Perëndimor”, u shpreh Rama.
Po kështu, kryeministri Rama me ironi tha se këto tentativa, s’janë gjë tjetër veçse shprehje e dëshpërimit të atyre që nuk ia duan të mirën vendit.
“Gramafonët që lajmëruan kobin e zi të mbylljes së negociatave, pa mbaruar ne as kafet e mirëseardhjes, ishin një shprehje ekstreme e dëshpërimit të atyre që duan të marrin me vete vendin në rrugën e theqafjes politike që e kanë zgjedhur vetë.
Nuk shkova në takim për vendimin në zyrën e kancelares, se ajo nuk e thotë kurrë fjalën e fundit të parën, pa dalë raporti”, tha më tej Rama.
