Shqipëria dhe Turqia kanë pasur dhe kanë marrëdhënie shumë të mira, por që prej ardhjes së kryeministrit Edi Rama në pushtet, investimet turke në vend janë rritur ndjeshëm, ku më i fundit ishte ndërtimi i Spitalit Rajonal në Fier, me porosi të presidentit Rexhep Tajip Erdogan.
Kreu i qeverisë e pranon se Turqia është faktore kyç për sigurinë në Bashkimin Europian, por hodhi poshtë zërat se Erdogan ka influencë në Shqipëri.
Teksa ndodhet në Itali ku po merr pjesë në konferencën online me temë “Europa një botë që po ndryshon”, Rama tha ndër të tjera, se nuk ka pasur asnjë shtysë nga pala turke, për konfliktin që kanë me Greqinë.
Edi Rama: ”Nuk ka dyshim që Turqia është kyce për sigurinë në Bashkimin Europian dhe BE është kyç për një Turqi më të fortë. Kur vjen fjala për rajonin më duhet të them që kemi një marrëdhënie shumë të mirë me Turqinë, është një marrëdhënie e rëndësishme, marrëdhënia me Erdogan, por dua ta bëj të qartë që nuk ka shenjë, jo më fakt të asaj që kanë pretenduar disa burime që Erdogan po ushtrojnë në Shqipëri apo rajon për otomanizimin e vendit. Nervozohem për lajme të rreme për xhami që ndërtohen xhami në Shqipëri për të influencuar, jo nuk është e vërtetë. Kur vjen puna te xhamitë jemi mirënjohës për projektin e restarurimeve. Nuk shoh në asnjë lloj mënyrë dicka të tillë. Nuk kemi pasur asnjë shtysë nga pala turke për të ndërhyrë për konfliktin që ato kanë pasur me Greqinë”.
