Rama, duke iu përgjigjur interesit të qytetarëve se kur do të ndryshojë fasha e orarit në Tiranë, tha se gjithçka varet nga qytetarët. Mbrëmjen e sotme në “Opinion”, kryeministri zbuloi se është shkarkuar shefi i Komisariatit të zonës së Liqenit, lidhur me situatën kaotike që ishte krijuar në këtë periudhë pandemie.
Rama u shpreh se ai u shkarkua pasi përtej orarit të lejuar, ishin parë ende qytetarë që frekuentonin parkun. Po kështu shtoi se Tirana nuk ka gjasa aktualisht për t’u kthyer në zonë të gjelbër.
“Tirana është zonë e kuqe. Sipas të gjitha gjasave, do të jetë e fundit që do të çlirohet, sepse situata nuk është premtuese.
Do të shohim të gjitha analizat e marra sot dhe nesër. Mos më kërkoni të bëj të mirin. Është shkarkuar shefi i Komisariatit në zonën e parkut të Liqenit, sepse kishte njerëz përtej kohës së lejuar. Numrat do të na flasin. Mos u çudisni, sepse mund të kthehemi prapë mbrapa! Jo se dua unë”, tha Rama.
