Pas qëndrimit të presidentit Meta, kryedemokratit Basha, reagimi pasardhës vjen nga ana e kryeministrit Rama, lidhur me çështjen e Teatrit.
Presidenti i Republikës, Ilir Meta, nuk ështe mjaftuar me deklaratën e fortë që bëri gjatë mesditës, kur e cilësoi si të shëmtuar dhe të turpshme rrethimin e Teatrit, dhe përplasjet e policisë me artistët.
Ai njoftoi se në orën 13:00 do t’i drejtohet Gjykatës Kushtetuese, për të depozituar kërkesën për shpalljen antikushtetuese të ligjit për shembjen e godinës së Teatrit Kombëtar.
Kjo lëvizje ka marrë vemendjen e kryeministrit Rama, i cili shkruan në një postim në Twitter se Teatrin e ri Kombëtar e kërkon kryeqyteti, vendi, kombi e shumica e komunitetit të artistëve të skenës.
“Teatrin e ri Kombëtar e kërkon kryeqyteti, vendi, kombi e shumica e komunitetit të artistëve të skenës. Njësoj si Stadiumi i Ri kombëtar ai do të jetë një gur kilometrik në rrugën e Shqipërisë që duam.Kush s’është dakord është i respektuar,po s’ka as mandat as të drejtë të pengojë.
Asnjë minorancë nuk mund të marrë peng asgjë e askënd në këtë vend. Megjithë respektin për një minorancë aktorësh teatri dhe politikanësh që s’kanë hyrë kurrë në teatër, po janë mësuar të bëjnë teatër me çdo gjë, Teatri i ri Kombëtar do të ndërtohet si plan e përgjegjësi qeverisëse”.
