Shkodra iu bashkua sot marshimit protestë që vjen disa ditë pas vrasjes së 25-vjeçarit, Klodian Rasha nga një efektiv policie.
Marshimi ka nisur nga sheshi ”Nënë Tereza”, në qendër të Shkodrës, duke përshkuar edhe pedonalen e qytetit. Ndalesa e parë ka qenë para prefekturës, për të vijuar më pas deri në fund të pendonales dhe për të ndaluar më pas para selisë së PS-së.
Ka një pjesëmarrje të madhe të qytetarëve, dhe një pjesë e tyre brohorisnin: “Drejtësi për Klodianin!” “Rama ik!” , ‘Rama e don popullin e tij prandaj e vret”, Të dorëhiqet Ardi Veliu!.
Prej 3 ditësh në Tiranë dhe qytete të ndryshme të vendit janë organizuar një sërë protestash. Ministri i Brendshëm, Sandër Lleshaj njoftoi dorëheqjen nga posti 2 ditë më parë, por protestuesit nuk janë mjaftuar me kaq.
Ata kërkojnë edhe dorëheqjen e Drejtorit të Përgjithshëm të Policisë, Ardi Veliu, megjithatë kryeministri Edi Rama ka deklaruar se diçka e tillë nuk do të ndodhë, duke i etiketuar protestuesit, si lukubi halabakësh.
