Kryeministri Rama ka folur sot para kandidatëve për kryetar të Bashkive të PS, të cilëve u ka lënë porosi që në zgjedhjet e 30 qershorit të ketë garë dhe fushatë intensive elektorale. Ai tha se objektivi i tyre nuk është të fitojnë Bashkinë, por të fitojnë sa më shumë kontakte me njerëzit. Duke folur me tone të ashpra për opozitën, ai e cilësoi si një fantazmë të së shkuarës.
“Në një pjesë të Bashkive nuk do të ketë kandidat, por do të ketë fushatë intensive për nga numri i kontakteve me njerëzit dhe ngritjen e kapaciteteve. Kudo që do të kemi kandidatë të opozitës politike. Dhe objektivi ynë nuk do të jetë thjeshtë të fitojmë Bashkinë, por të fitojmë sa më shumë kontakte me njerëzit.
Kjo do të jetë një betejë me zemrat dhe mendjet e shqiptarëve, me fantazmën e të shkuarës. Opozita është kthyer në fantazmën e të shkuarës, që është kthyer në shëmbëlltyrë të asaj hije. Ta zmbrapsim këtë hije njëherë e mirë, dhe do të ngordhë njëherë e përgjithmonë politika e pengmarrës dhe do të garantohet vetëm shteti ligjor.
30 qershori duhet dhe do të behet momenti i ngjitjes së politikës shqiptare në një standart të ri. Momenti i rënies përfundimtare të politikës shqiptare, mund të fitosh duke minuar edhe fushën, do marrë fund. 30 vjet janë mjaft për të thënë boll në 30 qershor”, ka thënë Rama.
