Mbështetës të opozitës dhe anëtarë të PD dhe LSI-së janë organizuar sërish për të protestuar kundër kryeministrit Rama.
Këtë herë, ata janë mbledhur për të bllokuar aksin Korçë-Pogradec, konkretisht në Grabovicë. Mes qytetarëve janë parë edhe ish-deputetët Klevis Balliu dhe Ervin Salianji.
Mësohet se protestuesit po presin kalimin e kryeministrit Rama, i cili ka planifikuar një takim elektoral në orën 18:00 në Pogradec.
Lidhur me këtë organizim, ka reaguar ish-deputeti i LSI-së, Endri Braimllari, i cili akuzon se Forcat speciale kanë rrethuar qytetarët protestues. Mësohet se Braimllari ka pasur një debat me drejtorin e Policisë të qarkut Korçë, të cilit i ka kërkuar që të zbatojë ligjin dhe të mos lëndojë qytetarët:
“Po mban peng qytetarët, që i ke rrethuar me forca speciale. Mos mbaj gjynafet e Ramës. Lëre Ramën, ta menaxhojë budallikun e vet, ti zbato ligjin. Do përgjigjesh personalisht nëse lëndon qoftë edhe një qytetar”.
