Kopshti i ri Zoologjik ka hapur dyert për të gjithë vizitorët. Kryeministri Edi Rama, i shoqëruar nga kryebashkiaku i Tiranës Erion Veliaj, kanë marrë pjesë në inaugurimin e Kopshtit Zoologjik në kryeqytet. Gjatë fjalës së tij, kreu i qeverisë e quajti një hapësirë fantastike dhe të rilindur. Rama tha se përveçse një hapësirë me plot atraksione dhe mundësi argëtimi, kjo është edhe një hapësirë mësimi, edukimi me botën e kafshëve.
“Më në fund lali Eri e mbajti fjalën. Një hapësirë fantastike. Një mjedis i rilindur tërësisht. I pakrahasueshëm me çfarë ishte më parë. Një Kopsht Zoologjik me hapësira fantastike për kafshët e mbledhura këtu, por edhe për fëmijët, edhe për prindërit, gjyshërit. Përvese një hapësirë me plot atraksione dhe mundësi argëtimi, kjo është edhe një hapësirë mësimi, edukimi me botën e kafshëve.
Është një ditë fantastike për fëmijët e Tiranës, por edhe të qyteteve të tjera, kopshtet zoologjike nuk janë në çdo qytet.
Ne do të organizojmë së bashku me Ministrinë e Arsimit dhe Ministren për Fëmijët edhe ekskursione nga shkolla të tjera të vendit, për të kaluar një gjysmë dite të bukur këtu.
Dua vetëm të falënderoj të gjithë ata që punuan për të arritur ditën e hapjes së dyerve, dhe në fakt është puna e shumë njerëzve që nga projektuesit dhe me radhë”, tha Rama.
