Pas shumë muajsh peripecish, akuzash dhe kundërakuzash midis tyre, Edi Rama dhe Lulzim Basha i kanë dhënë dorën njëri-tjetrit.
Një shtrëngim duarsh, i cili erdhi si rezultat i marrëveshjes së arritur prej tyre pas një takimi “kokë më kokë” prej rreth 3 orësh në Kryesinë e Kuvendit.
Të dy liderët politikë i hapën rrugën rreth orës 01:15 pas mesnate zgjidhjes së krizës politike kur deklaruan se arritën një marrëveshje midis tyre bazuar në paketën “McAllister +”
“Kemi një marrëveshje të bazuar tek paketa “McAllister +”. Marrëveshja do të detajohet në 24 orët e ardhshme, e pastaj do kemi një deklaratë të plotë për detajet”, u shpreh Basha, i cili e tregonte dukshëm objektivin që kishte arritur.
Nga ana e tij kryeministri Edi Rama nuk shtoi më shumë se sa dakordësinë me kreun e opozitës.
“Jam 100% dakord me kryetarin e PD”, duke shtrënguar në mënyrë sportive duart me Bashën.
Pas lajmit për arritjen e marrëveshjes, Lulzim Basha u drejtua për te “Çadra e Lirisë” për të dhënë lajmin. Nga çadra, Basha deklaroi se nga e enjtja do të nisë përgatitjet për t’u dhënë shqiptarëve zgjedhje të lira.
“Gjithçka ka ndryshuar, nesër nisim përgatitjet për t’iu dhënë shqiptarëve zgjedhjet e lira dhe të ndershme dhe për të nisur së bashku rrugën drejt një Shqipërie që do të ndryshojë, bazuar në vullnetin tuaj”, deklaroi Basha nga çadra.
Tashmë priten detajet e marrëveshjes së arritur në 24 orët e ardhshme. Palët e kanë lënë enkas një periudhë të tillë kohore pasi sot pritet edhe vendimi që do të marrë Kolegji Zgjedhor, i cili me shumë gjasa do të anulojë zgjedhjet e 18 qershorit, për t’i hapur rrugë një datë të re të zgjedhjeve parlamentare në vend.
