Kryeministri Edi Rama ka dalë në një video live në faqen e tij në Facebook, ku ka ftuar shqiptarët nesër në kongresin e Partisë Socialiste.
Rama akuzoi opozitën por edhe median për lajmin se ai është sëmurë dhe është shtruar në spital në Berlin. Kryeministri tha se në të vërtetë ishte në Berlin për t’u takuar me miq të Shqipërisë për të kërkuar mbështetje për celjen e negociatave, ndërsa shtoi se ishte vetë ai që kërkoi që takimet të bëheshin pa praninë e medias.
Më tej, kryeministri bëri me dije se do të hedhë në gjyq ata që shpikën lajmin se ishte sëmurë, “duke shqetësuar kështu një dynja”, ndërsa shtoi se opozita s’duhet krahasuar as me kafshët pasi ka humbur cdo element njerëzor dhe se bën politikë me shëndetin e të tjerëve.
Fjala e plotë e Ramës:
Gëzuar nga zemra me këdo e për këdo ju do zemra. Sot po përgatitem për Kongresin elektoral nesër, ju ftoj të vini nëse keni dëshirë.
Nesër është radha e Tiranës, por është edhe dita e ndezjes së motorëve elektoralë për bashkitë.
Shumë më shumë duhet bërë. Bashkitë anë mbetur peng, nesër do ju flas më gjatë dhe më gjerë. Kushdo është i mirë se ardhur. Siç e shihni jam mirë dhe nuk jam në spital në Berlin, por jam në zyrë në Tiranë. Edhe mund të sëmurem, por nuk është ky rasti. Isha për të takuar miq dhe partnerë të Shqipërisë , për të kërkuar mbështetje për çeljen e negociatave për Shqipërinë.
Nuk ishte një vizitë zyrtare, ishte vizitë joformale punë, që nga bisedat me ish-presidentë dhe ish-ministra deri në bisedat në Bundestag.
Janë takime që i kam kërkuar vetë pa mediat, për të pasur maksimumin e shpërndarjes së pikëpamjeve. U takova me miq këtu dhe qesha me lajmin e sëmundjes sime, të bësh opozitë duke sajuar lajme të rreme do të thotë se është prekur fundi.
S’kanë as atë element njerzillëku që dallon botën e njerëzve me kafshët, është gjynah t’i krahasojmë me kafshët. Me keqardhje për shqetësimin që i është krijuar shumëkujt, s’më mbetet gjë tjetër veçse t’i mëshiroj. Do kërkoj të përgjigjen në gjyq dhe të paguajnë për sajesën që shqetësoi të gjithë dynjanë.
Shikoni sa keq tallet me ju bota e kazaneve, më vjen keq për këdo që i sheh këto egërsira./ Tirana Today