Kreu i qeverisë Edi Rama, nga Vjena ku ndodhet në mbledhjen e Këshillit Special të OSBE-së, foli për çështjen e nxehtë të zgjerimit të ujërave të Greqisë. Ai tha se zgjerimi i Greqisë me 12 milje në detin Jon, nuk ka lidhje me paktin që po negociohet me Greqinë.
Kryeministri hodhi poshtë deklaratat për një marrëveshje të fshehtë për detin me Greqinë. Rama u shpreh se deklarata e Mitsotakis, nuk ka lidhje me ujërat tanë territorialë.
Sipas Ramës, marrëveshjet shtetërore nuk bëhen dot fshehurazi, ndërsa shtoi se nuk bëhet fjalë për konspiracion mes palëve.
“Deklaratat e kryeministrit grek për zgjerimin e ujërave të Greqisë, nuk ka lidhje me ujërat tanë dhe me marrëveshjen që po punojme. Dhe nuk e kemi arritur akoma me palën greke. Nuk ka lidhje me asgjë me ato që janë thënë në mënyrë të qëllimshme.
Shtrirja në 6 milje është një e drejtë e çdo vendi, Shqipëria e ka ushtruar. Ne jemi shtrirë në ujërat tanë me 6 miljet që në vitin 1990.
Mes ujërave territoriale ka ujëra ndërkombëtare, njëlloj sikur ka rrugë mes vendbanimeve dhe shteteve për të kaluar, ka edhe rrugë për të kaluar në det që janë të përbashkëta dhe marrja nga kjo rrugë e përbashkët në mënyrë simetrike të përcaktuar nga konventa, është e drejtë e çdo shteti.
Disa thonë shiko ç’a bëhet mes Turqisë dhe Greqisë, nuk ka lidhje me këtë aspekt. Ajo që ndodh mes Turqisë dhe Greqisë është një mosmarrëveshje për delimitimin e ujërave territoriale, që ne jemi duke e trajtuar në mënyrë konstruktive. Po për të cilën nuk kemi një rezultat përfundimtar dhe dakordësimin e dy palëve.
Pra, hartat që dalin janë spekulime që nuk kanë lidhje me realitetin. Një marrëveshje ndërshtetërore nuk bëhet dot fshehurazi. Qëndrimi jonë është i qartë, dhe puna me palën greke është konstruktive por deklarata e bërë, është pa lidhje me temën, nuk ka lidhje”, tha ai.
