Gjatë një prononcimi për mediat nga Vjena, kryeministri Rama ka dhënë komentin e tij lidhur me deklaratën e presidentit Meta, se do të mbrojë Kushtetutën përsa i përket pretendimeve të Greqisë për t’i zgjeruar me 12 milje në detin Jon.
Kryeministri Rama tha me ironi se Meta nuk duhet të ngatërrojë Kushtetutën e Shqipërisë me të drejtën e detit të Greqisë, dhe që nuk ka lidhje me Shqipërinë.
“Presidenti duhet të informohet mirë, dhe në vend të thotë se për çfarë është aty të bëjë atë që duhet bëjë dhe të mos ngatërrojë Kushtetutën e Shqipërisë me të drejtën e detit të Greqisë dhe që nuk ka lidhje me Shqipërinë. Mos e ngatërrojë dhe hedhë fjalën sikur ‘kapeni ju tani, dhe hajdeni mbroni Kushtetutën me mua’.
Për fat të mirë të Kushtetutës, presidenti nuk ka lidhje fare. E përcakton konventa ndërkombëtare, dhe nuk prek ujërat e Shqipërisë. Është si puna e kanioneve të Skraparit, ka shkëmbinj nga njëra anë dhe shkëmbinj nga ana tjetër dhe në mes rrjedha ujore.
Konventa u ka dhënë të drejtën të dy shkëmbinjve, mundësinë që të marrin nga ajo rrjedhë ujore brenda anës së tyre dhe jo të kapërcejnë lumin dhe të kapin shkëmbin tjetër, të marrin milje në mënyrë të barabartë. Shqipëria i ka marrë, Greqia do i marrë.
Presidenti të jetë shumë i qetë, se nuk është rasti për të bërë rafting me Kushtetutën, me marrëdhëniet ndërkombëtare dhe fqinjësinë e mirë”, tha ai.
Një ditë më parë, presidenti Ilir Meta nga Vlora i kërkoi qeverisë dhe të gjitha institucioneve të tjera, që të respektojnë vendimin e Gjykatës Kushtetuese, në lidhje me kufirin detar me Greqinë.
Meta theksoi se shqiptarët duhet të jenë të sigurt se presidenti gjithmonë do të mbrojë Kushtetutën.
