Gjatë qëndrimit në Davos, Kryeministri Edi Rama ka vijuar turin e takimeve me homologët e Holandës dhe Kroacisë, si shenjë lobimi për çeljen e negociatave brenda qershorit të 2018. Lajmi është konfirmuar nga vetë Rama me anë të një postimi në rrjetin social Facebook, ku shkruan se është folur për rrugën e Shqipërisë në plotësimin e kritereve të paracaktuar nga Bashkimi Evropian.
Ndërsa më tej ai shkruan se hapja e negociatave nuk ka një rëndësi strategjike vetëm për Shqipërinë, por kjo është një e mirë që shtrihet në të gjithë vendet e Ballkanit Perëndimor.
“Me kryeministrin kroat, Andrej Plenković, dhe kryeministrin hollandez Mark Rutte, mbi ecurinë e Shqipërisë në rrugën e integrimit evropian dhe rëndësinë strategjike të çeljes së negociatave për anëtarësim, jo vetëm për vendin tonë po edhe krejt rajonin”-shkruan Rama.
Gjatë ditës së sotme, Rama ka patur takim edhe me homologun grek, ndërsa si pjesë të diskutimeve kanë qenë çështjet të cilat po diskutohen mes vendeve, por edhe mbështetja e Greqisë ndaj aspiratave të vendit tonë për çeljen e negociatave.
Çështjet e vjetra mes Greqisë dhe Shqipërisë duket se kanë hyrë në një fazë të rëndësishme, por ende nuk dihet thelbi i takimit të Korçës pasi zyrtarët e të dyja vendeve kanë qenë shumë të rezervuara. Ndërkohë Rama vijon takimet në Davos, në vend opozita po përgatitet për një protestë, e cila është vendosur të mbahet në 27 janar.
Sipas përfaqësuesve kryesor të opozitës si brenda PD ashtu edhe LSI, situata në Shqipëri është e rëndë, prandaj shqiptarët kanë të drejtën e tyre të largojnë qeverinë e drejtuar Rama, që sipas tyre, krimi dhe korrupsioni ka kapur shqiptarët.
