Kryeministri Edi Rama, në Laç, ka ironizuar me Sali Berishën duke e thënë se atij ia vranë të gjithë bashkëpunëtorët. Rama thotë se Berishën e lanë vetëm si “Fanti spathi”. Kryeministri u shpreh se Berishës “ia vranë kupat, ia vranë çupat, ia vranë “Asat”. Sigurisht këtu kryeministri e ka fjalën për ata që kanë mbetur jashtë listave të Partisë Demokratike. Gjithkush prej nesh mund të nënkuptojë emrat e ish-funksionarëve të lartë të PD-së si; Jozefina Topalli, Majlinda Bregu, Eduard Selami, Astrit Patozi, Arben Imami, Ridvan Bode dhe shumë të tjerë të besuar të Berishës të cilët u tërhoqën nga listat e kandidatëve për deputet.
Këtu mund të shtojmë dhe faktin që Basha e ka vendosur Berishën të pestin në listën e Qarkut të Tiranës, duke krijuar premisa të një përjashtimi të mundshëm të liderit historik të PD-së nga politika.
“Sali Berisha i la rrugëve rruge. Ai ka bërë tenderë rrugësh më shumë se të gjithë kryeministrat në historinë e Shqipërisë të marrë së bashku. Por ama bënte tenderët por u thoshte kompanive shkoni filloni me lekët e juaja juve rrugët se ju a kam unë. Ne kemi paguar 720 milion dollarë për të larë borxhet dhe për te filluar punën. Berisha ka bërë 900 kilometra rrugë në të gjithë Shqipërinë gjithsej. Berisha dhe PD-në e la përgjysmë, dhe ka mbetur vetëm, ja vranë te gjithë shokët dhe rri vetëm si “Fanti spathi”. Kur e kishim ne në parlament ishte si “Derri maç”, me kurorë, me mjekër. Tani ka mbetur si “Fanti”, ia vranë kupat, ia vranë çupat, ia vranë “Asat”. Tani është Saliu “Fanti” dhe ata të tjerët janë njësh, tresh, katër, shtatë. Gjysma tjetër është më e rëndë për ata por s’po i hyjmë atij muhabeti se jemi bërë miq me ata tani”, tha kryeministri Rama.
