Kryeministri Edi Rama ka kritikuar Bashkimin Europian, për shkak të mos liberalizimit të vizave për Kosovën.
Gjatë konferencës për shtyp me ministrin gjerman për Europën Michael Roth, kreu i qeverisë u shpreh se BE e ka marrë peng Kosovën ”në një lojë shahu”.
Edi Rama: ‘‘BE është tempulli i demokracisë dhe politikës. Politika është shah, në shah ka pengje. BE nuk duhet të marrë peng asnjë për shkak të firmës që ka bërë vaksinën. Nuk janë shqiptarët e Shqipërisë, janë serbët, bohsnjakët etj. BE e ka marrë peng Kosovën. Peng është edhe Kosova. Një nga figurat ka vendosur që atë ushtar ta mbajë peng. Një nga figurat e shahut thotë jo. E turpshme por “ok”. Ne në Shqipëri kemi luftuar dhe ia kemi dalë pandemisë mbasi u lamë vetëm. Njësoj si të tjerët. Kishin hallin e tyre. Kush ishte dhe kush është objektivi? Të shpëtojmë jetë dhe jo të mendojmë që po shpëtuam gjysmë milioni jetë me vaksinën kineze dhe Europa do të thotë “jo”. Ne do bëjmë punën tonë.”
Ndërkohë, Roth tha se BE duhet të mbajë premtimet e veta dhe se liberalizimi i vizave me Kosovën do të duhej të ishte bërë prej kohësh, pasi kushtet janë përmbushur.
Michael Roth: ”BE duhet të mbajë premtimet e veta dhe këtë e them si autokritikë. Liberalizimi i vizave me Kosovën duhet të ishte bërë prej kohësh. Kjo sepse kushtet janë përmbushur. Edhe në këtë rast është e njëjta logjikë. Unë nuk mund të ndryshoj traktatet e BE-së, Bashkimi Evropian është ndërtuar mbi konsensusin dhe unë nuk mund të ankohem në këtë drejtim.”
