Në Beograd nisi panairi i verërave ku marrin pjesë 333 ekspozues. Ky panair është i pari që mbahet pas marrëveshjeve të nënshkruara në kuadër të “Ballkanit të Hapur”. Kryeministri Rama u shpreh se “Ballkani i Hapur” është një projekt paqeje. Sipas Ramës, vendet e Ballkanit, të cilat i krahasoi me një lagje të vogël të Europës, tha se është koha për të bashkuar qytetarët dhe jo për t’i kthyer krahët njëri-tjetrit. Kreu i qeverisë shqiptare theksoi se “Ballkani i Hapur” është shumë më tepër se sa ekonomi e tregti, më tepër se sa politikë, por një projekt paqeje dhe bashkëjetese në paqe.
“Më duhet të flas në gjuhën time, se nuk e njoh gjuhën tuaj të çuditshme. Vendosa të mos e përdor fjalën që më kishte përgatitur ekipi im, se niste me shprehjen që “ne në Shqipëri kemi krijuar verën e parë në Ballkan që në epokën e bronxit”.
Unë nuk e di sa e vërtetë është kjo, por di që kemi humbur shumë kohë duke u përpjekur t’i tregojmë njëri-tjetrit kush ka qenë i pari, kush është më i vjetri. Kush e ka marrë i pari të drejtën të jetojë në këtë vend. Ndërkohë një gjë kemi mësuar të gjithë që asnjë prej nesh nuk do shkojë diku tjetër. Të gjitha vendet tona janë këtu për të qendruar dhe pas nesh shumë vite e shekuj pas nesh.
Zgjedhja jonë është si të qendrojmë këtu në këtë vend, duke qenë bashkë në të njëjtën lagje të Evropës, duke u përpjekur ta bëjmë më të jetueshme, paqësore për gjithë njerëzit tanë, apo duke hedhur gurë mbi tjegullat e njëri-tjetrit e duke i vënë flakën njëri-tjetrit si kemi bërë në shumë vite e shekuj.
“Ballkani i Hapur” është shumë më tepër se sa ekonomi e tregti, e shumë më tepër se sa politikë po e po, është një projekt paqeje dhe bashkëjetese në paqe. Një projekt i bashkimit në paqe, të një vizioni të përbashkët për të ardhmen, që kjo lagje e vogël në mes të Evropës mos vuajë më nga hijet e së shkuarës, por të bëhet vendi i të ardhmes për gjithë rininë tonë”.
