Kryeministri Edi Rama, në takimin elektoral në Urën Vajgurore, u tha banorëve se partitë e vogla nuk mbajnë asnjë përgjegjësi kur janë në qeverisje. Rama tha se aleatët në koalicion madje dërgojnë mesazhe të kamufluara që janë kërcënime dhe shantazhe, por ne dukje janë kritika ndaj qeverisë. Këto mesazhe sipas Ramës, partitë në koalicionet qeverisëse, i dërgojnë për të marrë dhe për të pasur sa më shumë pushtet.
“Partitë e vogla marrin nga pushteti atë që ju ofrohet dhe nuk u kërkohet llogari dhe nuk mbajnë asnjë përgjegjësi. Ato përgjegjësinë iu a hedhin gjithmonë partive të mëdha që drejtojnë në qeveri. Përkundrazi dërgojnë mesazhe të kamufluara gjysmë shantazh dhe gjysmë kritikë ndaj partisë drejtuese në qeveri për të përfituar sa më shumë pushtet. Tani na duhet të luftojmë për të pasur të vetëm drejtimin. Mund të jesh demokrat por nuk mund të votosh Lulzim Bashën sepse ai nuk di të bëjë asnjë punë”, tha Edi Rama.
Ndër të tjera Rama tha se “Qeverisja jonë është e ndarë në dy pjesë. Pjesa e parë në mandatin e parë ne kemi bërë organizimin dhe kemi ngritur themelet për ndërtimin e shtetit me reformat që kemi ndërmarrë. Në mandatin e dytë do të thellojmë reformat dhe do formojmë pak nga pak shtetin. Kemi ndërmend të bëjmë dhe një reformim nga brenda të institucioneve të shtetit. Po nuk u hoqën të drejtat e partive për të vendosur kush do bëj çfarë në shtet.”
