Shqiptarët shpenzojnë goxha për t’u argëtuar, por a e dini se cilat qytete shpenzojnë më shumë për t’u argëtuar, çlodhur dhe për të ndjekur arte?
Sigurisht, stafetën e mban kryeqyteti dhe kjo është krejt e thjeshtë për t’u parashikuar, teksa ka numrin më të lartë të kinemave, teatrove, por dhe të njerëzve që janë të interesuar për t’i ndjekur ato.
Sipas INSTAT, në Tiranë janë të përqendruara 62.4% e totalit të shpenzimeve të argëtimeve në vend, apo rreth 157 milionë euro, ndërsa kategoria “Arte, argëtim dhe çlodhje” zinte 4.3% të totalit të vlerës së shtuar bruto për vitin 2015.
Por, qyteti që ka befasuar është pikërisht Gjirokastra, i cili njihet si një qytet me banorë që kursejnë shumë.
Megjithatë, duket se statistikat dëshmojnë të kundërtën. Sipas raporti të INSTAT për vitin 2015, shpenzimet për “art, argëtim dhe çlodhje” në Gjirokastër zënë 2.6% të vlerës së shtuar bruto në vitin 2015, duke u renditur e dyta, menjëherë pas Tiranës.
Komuna më e pasur në Shqipëri është Zagoria, ku niveli i varfërisë është vetëm 2.5%.
Nga 10 njësitë me varfërinë më të ulët, 7 janë në Gjirokastër dhe 3 të tjerat në Korçë, Sarandë e Përmet. Po në Gjirokastër janë dhe njësitë që kanë konsumin më të lartë për frymë në vend, ku kryesojnë Zagoni, Pogoni, Odrie, Antigona, Dropulli i Sipërm, qyteti i Gjirokastrës etj, zona këto që kanë marrë në vite pensione nga Greqia.
Pas Gjirokastrës, vjen Korça e cila renditet e treta në peshën që zënë shpenzimet për argëtim, çlodhje dhe art, me 2.4% të vlerës së shtuar bruto të atij qyteti.
Serenatat, ushqimet karakteristike dhe turizmi malor e ka kthyer Korçën në një destinacion të preferuar të fundjavës për shumëkënd duek tërhequr shqiptarë, por edhe të huaj.
Në vend të katërt renditet Vlora, e cila është një nga destinacionet më të dashura në verë. Pikat kryesore të preferuara për turistët mbeten Drimadhes, Himara, Dhërmiu. Shpenzimet për argëtim dhe art zënë 2.3% të totalit të shpenzimeve totale të Vlorës.
Më tej, në vendin e pestë është Lezha, ku banorët e këtij qyteti shpenzojnë të njëjtën peshë si në Vlore, me 2.3% të totalit.
Pas Lezhës vjen Shkodra, me 2.1%, duke vijuar me Durrësin, ndërsa më pas renditen Berati, Elbasani, Kukësi dhe Fieri.
Vendin e fundit e zë Dibra, ku mesa duket banorët e këtij qyteti nuk shpenzojnë shumë për t’u argëtuar, teksa pesha e shpenzimeve zë vetëm 0.6%.
